احمد رضا نے محفل نعتوں کی یوں سجائی

منقبت
نذرانۂِ عقیدت بہ حضورِ اعلیٰ حضرت امامِ اہلِ سنت مولانا شاہ احمد رضا خاں محدث و فاضلِ بریلوی علیہ رحمۃ اللہ الرحمن عزوجل
ندیم احمد ندیم قادری نورانی


احمد رضا نے محفل نعتوں کی یوں سجائی
قرآں کی آیتوں میں شانِ نبی دکھائی

محبوبِ رب کے عاشق احمد رضا نے بیشک
لاکھوں دِلوں میں شمعِ عشقِ نبی جلائی

ناموسِ شاہِ بطحا کے پاسباں رضا نے
ہر بے ادب کے رد میں نوکِ قلم چلائی

وہ خیرِ اتقیا بھی اور فخرِ اولیا بھی
سر پر اُنھی کے جچتا ہے تاجِ اصفیائی

تعلیمِ اعلیٰ حضرت سے باغِ علم مہکا
فکرِ رضا نے بزمِ افکارِ حق سجائی

کتنے فنون میں وہ ماہر ہیں رب ہی جانے
فہرست کوئی کامل اب تک نظر نہ آئی

اربابِ علم و دانش حیران ہیں رضا پر
اہلِ نظر بھی اُن تک رکھتے نہیں رسائی

اُن کے لب و قلم کی جنبش کے ماحصل سے
اپنے پرائے سب ہی لیتے ہیں راہ نمائی

باغِ رضا سے پھیلیں روحانیت کی شاخیں
اس کے گُلوں سے خوشبو اہلِ صَفا نے پائی

وہ تاجِ اہلِ سنت قصرِ بریلوی سے
دیتے ہیں گنج ہاے فیضانِ مجتبائی

احمد رضا رضاے احمد کے راستوں پر
چل چل کے بن گئے ہیں مرضیِّ مصطفائی

غوث الوَرَا کے نائب احمد رضا، مدد کن!
مشکل میں آج میں نے لَو آپ سے لگائی

میں نے ندیم جو کچھ شانِ رضا میں لِکّھا
فَیضانِ مُرشِدی ہے اور فضلِ کبریائی